點解六四唔關我事？點解我哋唔紀念六四？

[匿名者]

點解六四唔關我事？點解我哋唔紀念六四？

紀念六四，係個人有意識而做嘅行為，唔係好似眨眼呼吸噉無意識嘅行為。

有意識先做嘅嘢，你實會諗至少一個理由，去撐你做嘅嘢係啱、係有必要。

噉你就玩完啦。無論你個理由係乜，你就跌入「同情『中國人』」嘅陷阱。

哪怕你話，我悼念佢就係因為佢反極權，所以值得悼念。其他人反極權我都一樣悼念。

噉問題就來啦，就算係中國境內，反中國政府嘅，有西藏人、蒙古人、維人……西藏人同六四同期搞咗幾年 https://en.wikipedia.org/wiki/1987–1989_Tibetan_unrest ，點解你唔一樣好似拜六四咁神心年年拜佢哋山？

答案就係，你始終都係中咗「中國人」呢個蠱毒共同體。

而我，從香港人嘅立場出發，有咩理由紀念六四？

六四係兩班中國人嘅政治鬥爭。中國人係殖民我哋、欺壓我哋嘅外來民族。我有乜理由去悼念是但一邊？

再者，多數公眾都係業餘政治愛好者。佢知六四事件發生過，佢知趙紫陽鄧小平王丹柴玲吾爾開希李鵬薄一波，但係佢仲知得幾多？
去關心六四呢件事，業餘政治愛好者往往好易陷入二分法思維，分好人衰人，分忠奸。學生係忠，屠城解放軍係奸。趙紫陽係忠，鄧小平係奸。王丹柴玲吾爾開希係忠，李鵬薄一波係奸。司徒華李卓人何俊仁係忠，梁振英曾鈺成譚耀宗係奸。
又或者，你去同藍屍理論：六四究竟有冇死人？六四係咪美國佬喺Hollywood拍嘅流嘢？六四鎮壓係啱定錯？六四應唔應該平反？「六四帶來穩定促進經濟發展」係啱定錯？……

更加符合香港national interest、香港人立場嘅，應該係，我話之你六四屠城有冇發生過，我話之你六四係咪美國CIA炮製嘅disinformation，我話之你六四邊一方係啱、正義，我話之你六四係咪有助經濟發展……
總之你哋ham baang laang都係中國人，都係我哋嘅敵人，我哋要獨立，要脫離中國人。

否則，第日共產黨真係平反六四嗰陣，或者換一班肯平反六四嘅中國人掌權嗰陣，香港人就又要嘥時間辯論：「依家共產黨改邪歸正啦，依家支持民主嘅中國人執政啦，我哋係咪應該擁護中國新政府、中國人、中華民族、中華文化呢？」

從今日起，六四唔關我事！六四唔關香港人事！

紀念香港人嘅歷史！紀念612包圍立法會、71佔領立法會、721元朗暴徒血案、831太子站黑警血案！

紀念香港人嘅民族英雄！紀念熊家俊、梁凌杰、梁健輝！