結婚一年不停被催生BB, 心急父母上門摷避孕套避孕藥, 港女:我真係精神崩潰!


  • 有仔趁嫩生,也明白四大長老心急抱孫,不過現今社會太多因素要考量,所以出生率大減。有港女被父母催生,表示同老公結婚半年,媽媽開始問「幾時生BB?」,半年後,父母行動升級,媽媽上門摷避孕套避孕藥,一見即鬧,父母更毫不留情,在屋企的whatsApp群組問女婿係咪性無能,令港女崩潰。

    該名港女日前在facebook的「巴打絲打『13親子育兒』」發帖,主題是「請教:有無人同我一樣,成日俾阿爸阿媽不停問幾時生BB?可以點解決?」,她透露和老公於上年年中結婚,兩公婆人工OK,婚前已經儲好首期,在娘家附近買了層樓,既可以與父母互相照應,又可以返娘家黐餐,返屋企又可以二人世界。

    該港女續指,老爺奶奶居於外國,思想也open,沒有給予他們生仔壓力,當他們以為新婚後一切都是美好的時候,豈料才是惡夢的開始,

    今年年頭,我媽不停問我哋生唔生,幾時生。我之前真係太傻,將鎖匙俾咗阿媽,諗住方便啲,佢可以幫我哋執下屋,點知佢好似啲瘋狂粉絲咁成日上嚟摷我哋垃圾,睇我哋有無用dom,又係咁摷我房床頭櫃,一見到有dom有避孕藥就鬧我,做咩仲要食同用!我真係精神崩潰。

    為了生唔生的問題,港女與媽媽吵架無數次,她亦解釋了很多次,因為他倆一起供樓、俾保險、衣食住行及父母家用,剩餘的只能儲起少少錢,如果生B的話,沒有錢剩,而且BB長大要返學、學興趣班、請工人姐姐等等,加上近兩年全球的經濟同疫情,她與老公都想睇定啲先打算生唔生。

    點知佢哋講極都唔明!!!!仲話:有仔趁嫩生,諗咁多做咩,當年我哋都係咁湊大你㗎啦!

    最近她的父母催生行動升級,兩老竟然在屋企的whatsApp群組問女婿係咪性無能?並表示當年後悔把女兒嫁給他,人夫嬲到即quit谷,港女指老公是做audit,工作壓力大,現在要睇情緒科,她向媽媽講述老公的情況,望她不要再逼他們生B,卻遭媽媽反問,

    佢有精神病?要唔要食藥㗎?食果啲藥會唔會影響生唔到仔啊?唔怪知得佢性無能啦!

    港女嬲爆父母不懂體諒,仍堅持想他們生B,話他們唔生係不孝,又話他倆令她老人家好失望,媽媽更指冇孫抱會令他們人生有遺憾,死唔眼閉!

    其實我哋唔係唔想生,我只係想知...我究竟仲可以做啲乜嘢,或者講啲乜可以去令我阿媽明我哋而家嘅情況,鬼唔知有仔趁嫩生咩!我都想有錢可以生啊!生仔養仔咁貴,想儲多啲錢先進行咋嘛!人生真係好難,有無人可以俾咩意見我哋啊?

    港女發帖向網民求助,點樣可以塞住阿爸阿媽把口?又唔想再俾壓力老公,再係咁,她好驚會離婚啊!許多網民明白樓主的處境,認同她的父母是情緒勒索,著她快把鎖匙收回;有網民叫樓主要企硬去保護老公。