陳山聰小紅書用廣東話開Live宣傳《超能使者》遭禁播


  • 由陳展鵬、唐詩詠、陳山聰及劉穎鏇主演嘅TVB台慶劇《超能使者》正在熱播中,日前陳山聰就喺內地社交平台「小紅書」開直播為劇集宣傳,兼同一班網民傾下偈。喺結束直播後,陳山聰喺小紅書出PO向網民道歉,指因用廣東話開直播而被暫停12小時直播:「抱歉各位,由於直播期間全程用廣東話被暫停12小時直播。唔緊要,明天晚上我會再直播,到時大家再見。」

    事件發生後,隨即引起內地網民熱烈討論兼鬧爆小紅書,例如「竟然唔可以講廣東話?太離譜了吧」、「太過分啦,點解針對粵語,英文日文韓文東北話上海話等,咩都有人講,點解一直咬住粵語唔放」、「無語了吧,為什麼廣東話也要被禁???這難道不是中國話之一嗎」、「對小紅書好失望」、「點解唔俾講廣東話,必須撐粵語」、「支持廣東話!」、「好癲,居然唔俾講廣東話」及「這個平台是不是有病」等等。而後來陳山聰亦有留言安慰網民:「大家不用勞氣、好少事、每個平台有自己準則,只不過我唔知道,已經了解好。明天晚上我會繼續係小紅書直播、希望大家繼續支持 超能使者同高勇啦」