張導：我唔會隱惡揚善，唔會唱好，我一向唔係咁嘅人

[匿名者]

說好香港故事？丨張婉婷加入政府小組推廣香港「新優勢」 網民籲杯葛《給19歲的我》 張導：我唔會隱惡揚善，唔會唱好，我一向唔係咁嘅人
​政府新聞處本月27日發稿宣佈成立「 #推廣香港新優勢專責小組 」，稱小組專注將香港「在新發展階段下的新形勢、新潛力和新機遇，建構論述」，「透過適切了解市場和持份者的想法，以及藉直接溝通和公關推廣，讓本地、海外及內地的朋友和持份者對香港的優勢和機遇有更全面的了解，使香港的優勢能被充分認知、認識和認同。」字雖多，但內容空泛難懂。
政府新聞稿稱，小組由財政司司長 #陳茂波 率領，「 #說好香港故事 」，成員包括財政司副司長黃偉綸、律政司副司長張國鈞，以及多位局長級官員，計有醫務衞生局局長 #盧寵茂 、商務及經濟發展局局長丘應樺、政制及內地事務局局長曾國衞、文化體育及旅遊局局長楊潤雄等等。小組成員亦有不同界別代表，當中一位是《 #給19歲的我 》導演 #張婉婷 。
《給19歲的我》下月2日正式上映，有關張婉婷加入「推廣香港新優勢專責小組」的報道周一晚亦迅速於網上發酵，有留言稱：「一個地方本來就好何必要到處宣揚，只有越來越不堪先需要搞咁多無謂嘢。」、「自由社會是看到的不是聽到的，無端端有幾十萬人走不是正常，香港只是一個滿佈紅線的城市。」另有網民籲杯葛《給19歲的我》，有留言寫道：「張導演收咗幾多錢先做啲咁嘅嘢呀，佢唔知佢咁樣做套電影票房一定跌嘅咩？定係優先場已經回咗本？」
【「『唱好故事』呢啲嘢我唔會做」】
張婉婷導演晚上接受《娛壹》訪問，回應加入專責小組詳情。張婉婷斬釘截鐵謂：「唱好故事呢啲嘢我唔會做，啲『故事』唔會因為你唱就會好，而係應該真誠去講，令人相信你，咁先會尊重你，呢個係我一向嘅原則。」《給19歲的我》由英華時任校長 #石玉如 女士建議開拍，校方出資，張說：「就算係校長畀錢我拍，我都唔會隱惡揚善，唔會唱好。我一向唔係咁嘅人。」
張婉婷是 #香港電影導演會 會長，亦是 #電影發展局 副主席（主席為文化體育及旅遊局常任秘書長黃智祖）。她稱今次是黃偉綸邀請她加入小組，對方稱小組工作是推廣香港「新優勢」，「冇人同我講要『唱好香港』、『說好香港』。黃偉綸話，『睇吓香港有咩新優勢介紹畀人，你都要入，如果唔係冇人推介香港電影㗎喇。』」
「我初初都唔諗住入去，佢（黃偉綸）話你同業界傾吓啦。我同業界傾點做好，佢哋就話你要入去，代表業界，睇吓政府可唔可以出錢幫電影界，做一啲『新優勢』出嚟。」
【推動香港電影至國際市場：人唔可以自我審查】
張婉婷表示，出任小組成員是代表業界發聲，屬義務性質，並無酬勞，至今尚未開會，亦不清楚小組成員有誰，「完全唔知邊個打邊個」。至於其眼中電影業的「新優勢」，張婉婷稱：「舊年好多香港電影上映，行業復蘇，新題材、新導演湧現，亦有相當好嘅票房，香港電影慢慢都有番呢個優勢。既然有咁多現成作品，我覺得唔好錯過呢個時機去push。」
她以韓國為例，稱政府為推廣韓國電影不遺餘力，港府過去亦曾於海外舉辦影展，「去年好多新導演作品上畫，仲有幾千萬票房，好似浪潮咁樣，觀眾又認可，票房口碑都好好，可以推去國際，慢慢推下推下，令香港電影有國際市場，呢個係我初步構想。」會否擔心有些電影不合小組「官方要求」？張婉婷反問：「點解唔得？香港政府有咩理由唔幫？舊年啲戲都上晒畫，只係講去年已經夠做一個影展。人唔可以自我審查，唔好內心自設紅線。」
【網民籲杯葛：戲中我係如實地將我要講嘅嘢講出嚟】
問及有網民呼籲杯葛《給19歲的我》，張婉婷表示甚少上網，「我好純粹，業界叫我幫我電影界，我就幫。」至於杯葛，她說：「我以為自己與世無爭，最多話我套戲唔好睇。戲中我係如實地將我要講嘅嘢講出嚟。」
張最後說：「有啲嘢唔做，你點知唔得？呢個世界，做吓做吓就得，你有咁信念、努力同堅持，或者會有一絲希望。故事唔係用嚟唱，而係真誠去講，用誠懇心對待，邊啲係真邊啲係假，啲人就會知。」
#娛壹

https://www.facebook.com/plugins/post.php?href=https%3A%2F%2Fwww.facebook.com%2Fas1hk.entertainment%2Fposts%2Fpfbid02cBnsiacubgMzVCbSa9TT7zRquLg8bZDrnmYc9Hr51JZrKm1sWf3kpMRaH3UwDg4dl