R.S.International: 確認一名曾下落不明嘅屠龍小隊隊友平安 現正流亡於英國

[匿名者]

https://www.facebook.com/106544101050232/posts/206956417675666/?d=n

R.S.International

幾時再見 - When Will I See You Again?

之前團長、Edward同James曾經喺訪問都提到屠龍嘅成員裡面，其中都有下落不明嘅隊友 ，喺眾多不幸嘅事情中嘅一點萬幸，失蹤咗一年嘅戰友Chris早前終於同我哋重新聯繫 ，Chris現正流亡於英國。

Chris :「同其他成員有啲唔同，我自問係比較好彩，喺12月8號嘅拘捕行動前，我係因為中大保衞戰中受咗重傷而暫時脫隊，所以當初差佬嘅拘捕行動我係僥倖避過咗嘅。仲記得果日朝早起身，睇到telegram上轉發嘅新聞報導，有手足因為藏械而被拘捕，我嘅心係沉咗落谷底，果刻你會感受到一種時間嘅凝結，同埋個人嘅靈魂好不知所措......而且甚至睇到當時普通朋友喺朋友間嘅whatsapp group到半講笑嘅性質咁講：『不如話手足有高達』（我明大家好想串鳩黑警呀，但對於我哋當事人嚟講，你哋呢啲說話我哋睇到係好心酸），係有一種好大好無奈嘅孤獨感，你知道，唔會有人明白你。」

「大概知道其他成員如Edward及James等都被捕，鑑於唔知道仲有咩屠龍相關嘅聯絡人係安全嘅情況下，案情都相對嚴重，所以同另外幾個可靠嘅支援者討論後，大家都建議我盡快離港避一避（而家戶口都被凍結埋...）。果陣嚟英國嘅時候，英國仲仍未推出BNO法案，自己身上都無帶咩證明去proof到自己係有需要政治庇護嘅asylum seeker，為咗嘗試留得一時得一時，當時我就問親戚借咗一筆錢，希望可以借住student visa延長一下自己嘅居留，所以而家就喺英國讀緊postgraduate，當時諗法主要都係用學生身份去extend可留嘅日數。無奈銀行戶口又被發現，結果同團長一樣，暫時都無力償還學費......」

「但無論如何，相比起曾經共過患難，但而家身陷囚徒，正等待住唔知幾多年月嘅牢獄歲月嘅戰友，我實在係唔能夠再去點講我有幾不幸，反而，我好感激每日都仲吸到自由嘅空氣，可以隨時去睇自己想睇嘅書，間唔中食到自己鍾意食嘅嘢，可以喺街上睇下人來人往嘅風景......我好想自己將來有一日，能夠有能力為果啲受完刑嘅手足準備一個好啲嘅未來。」

「透過其他手足嘅傳話（特別鳴謝抗爭聯合育成嘅女勇），加上自己喺英國都開始settle down，所以睇到新聞，得知團長佢哋仍然安然無恙，我就重新同龍隊其他成員再次聯絡起來，團長知道我喺英國已經穩定住嘅地方，寄咗幾件R.S. International T-shirts，縱使呢刻同R.S.嘅幾位手足，以及香港嘅家人朋友分隔幾地，我自己都唔太奢望有機會返到香港同大家見面，但願能夠喺可見將來嘅某一天，可以喺世界某一角落再次見到R.S.嘅手足、家人同仲身在喺香港嘅朋友。」

圖中攝於倫敦大學嘅Senate House，Senate House曾經被George Orwell喺描寫極權統治嘅小說《1984》中作為the Ministry of Truth（真理部）嘅現實場景依據。1984同真理部所描寫嘅顛倒黑白是非、扭曲真相、自我審查已一一喺香港發生，小說家所想像嘅未來經已發生喺我哋身上。'Big Brother is watching you'，近期亦見到英國學生手足團隊Powers to Hongkongers提到在英嘅留學生都因為曾經因為英國院校配合中共嘅自我審查而對在英嘅留學生手足進行滅聲。喺呢一日，我哋當然要小心行動，但同時都唔可以因為「小心」而畏首畏尾，大家要冷靜地判斷而家可以做到嘅嘢，為將來作最好嘅準備。

如有任何查詢 請留言/inbox，謝謝。
—————————————————
Website:
http://www.rsinternationals.com/
Facebook:
https://www.facebook.com/RSInternational-106544101050232/
Instagram:
https://instagram.com/_rs.international
Telegram:
https://t.me/dragonslayerbrigade
#rsinternational #長貧難顧 #自力更生 #要生活先生存
#台灣代購 #台灣雜貨 #台灣直送 #聖誕快樂 #聖誕節 #聖誕咭 #麻辣鴨血 #台式火鍋 #微卡蒟蒻麵 #微卡蒟蒻飯 #佳德鳳梨酥 #奕順軒 #老媽拌麵 #賈以食日 #糖村 #簡單李 #青鳥旅行 #武松殿 #蘇老爺 #鬍鬚張