Hong Kong is not only a place, it is 我地

[匿名者]

【香港係我地】

相信好多香港人正面對去留嘅掙扎，有人認為只要有心，邊度都可以係香港，主張香港唔係一種地域概念，而係一種精神概念，相對輕視香港呢片土地嘅重要性。呢種諗法係非常危險，香港呢片土地唔係condom，而係香港人呢個身份嘅根源。

『空間、地方與祖地』

空間(space)係指地理位置，例如香港位於深圳河以南。當開始有人居住，對呢片土地產生共同嘅認知，並賦予其意義，空間(space)就會變成地方(place)。我哋喺香港出世、成長同定居，多年嚟為呢片土地賦予意義，香港就成為咗香港人嘅地方係香港人嘅祖地(homeland/motherland)。祖地對於一個族群有特殊意義，唔係一塊地咁簡單，係不可取代嘅存在。

『祖地嘅意義』

祖地能夠幫我哋區分「我者」同「他者」，為身份認同劃下邊界，去旅行嘅時候我哋會話"I am from Hong Kong"。祖地孕育我哋成長，同我哋有種互為依存嘅關係，如果唔係生於香港呢片福地，我哋都唔會有今日嘅成就。祖地能夠提供安全感同歸屬感，因為我哋喺香港有較多嘅個人經歷，每次落機返到香港都有一種終於返到屋企嘅安心。祖地係歷史、記憶同故事嘅載體，中上環舊建築印證英殖時期嘅歷史，金鐘夏慤道盛載住香港人抗爭嘅故事，我哋會透過認識過去以加強同土地之間嘅連繫。

『文化臍帶嘅切割』

當人離開祖地，就好似將母親同嬰兒之間嘅臍帶切割一樣，失去維持生命所需嘅養分 – 文化。祖地同文化兩者密不可分，喺異地上創造嘅文化好難稱得上係香港文化。即使可以完整咁將香港文化帶去外國保留，人在異地要適應新文化，喺別國嘅文化土壞之上，強行帶過嚟語言、習俗往往缺乏實踐嘅空間，最後好可能會淪為毫無生命力嘅文化標本。就算可以透過資訊科技了解香港嘅改變，但始終唔能夠踏足土地去感受香港嘅生活，對香港嘅印象只會永遠停滯，慢慢會忘記彌敦道嘅繁忙，對昔日嘅家鄉感到陌生，好難再有文化創造。文化嘅存續不在於保留，而在於其創造力。一旦香港文化喺異地失去創造力，畀你傳承得再好，都會有消逝晒嘅一日，留得一代，留唔到下一代。

『身土不二』

有人認為只要喺外國建立香港人社群，就可以建立「海外新香港」，呢種諗法係缺乏「祖地意識」嘅表現。香港嘅構成絕對唔係只有人，有好多嘢係唔能夠複製，例如天氣環境、地理面貌、人造建築。如果香港係一個又乾又凍、城市密度低、毫無歷史痕跡嘅地方，「香港人」嘅生活習慣同文化都會變得好唔同，身份認同亦會失去基礎。我哋必須意識到香港係不可取代嘅祖地，係前人用咗過百年歷史建構出嚟嘅家邦，呢個世界只有一個地方叫香港。任何輕視香港作為祖地、妄想建立海外新香港嘅主張，就等同將香港嘅百年基業拱手相讓畀中共，自斷香港人嘅血脈。

『離開是為了回來』

去或否從來都係個人選擇，冇必要批判對方，但我哋必須要意識到香港呢片土地嘅重要性。如果民族係靈魂，土地就係肉體。肉體失去靈魂會慢慢腐爛，靈魂離開咗肉體就係無主孤魂。冇錯，靈魂可以不滅，但最終都要返回軀體，先能夠做一個有生命力嘅人。鄉愁係最高貴嘅痛苦，唔好甘願做一個無根者。正如流亡港人許智峯所講：「我永遠不會移民，我的家只有香港；我已下定決心，我必定會回家。」如果你覺得自己係迫不得已離開，請你以返回祖地作為目標，為重踏家鄉故土而努力。因為香港唔係人咁簡單，香港仲係「我地」– 香港人嘅土地。

//同熱愛這片土地 大家刻骨銘記
愁或喜 生與死 也是香港地//

• 《真．香港地》

參考資料：
顧濟時(2020)。香港民族及其祖地。《新香港》第一期。
Penrose, J. (2002). Nations, states and homelands: territory and territoriality in nationalist thought. Nations and Nationalism.
Safran.W. (1991). Diaspora in Modern Societies: Myth of Homeland and Return. Diaspora: A journal of transnational studies.
—————————————
想繼續睇多啲本土抗爭論述？Follow我哋嘅：

【Facebook】Gear噏
【Instagram】gearup_hongkong
【Telegram】gearup_hongkong

#Gear噏 #gearup_hongkong #香港人 #香港係我地 #香港地 See Less