因為唐山件事，同朋友鬧交，有感

[匿名者]

個個都話應該建議人唔好加害人，唔應該提倡叫人學防身術，買防狼器保護自己。（e.g 唔應該建議女人做啲咩，應該建議男人唔好做啲咩）

鬼唔知唔應該加害人咩，呢樣都提倡咗好耐啦，我諗係常識啦嘛？然後建議未成為受害者嘅人做好保護自己嘅準備係錯？

首先，加害嘅事件係一個不可控嘅因素，冇人控制到，唔係話你建議就冇加害嘅事件出現。法律其中一個意義就係以刑罰去建議人唔好加害，咁法律都存在咗咁多年啦，未又係一樣有加害出現。說明加害係冇可能根治到，有人就會有加害嘅機會。（呢度唔係話建議人唔好加害係錯，係話呢個建議對於「減輕受害程度」呢個目的嘅成效冇咁顯著，甚至有啲太理想）

咁既然加害嘅出現係無可避免，做好應對加害嘅準備係唯一做法啦係咪？準備就只可以從社區設備、法律同自身開始著手。前兩者都係需要組織政客去提倡改變，所以我哋唯一可以做嘅就係準備自身去應對加害。咁有咩錯？點解呢樣嘢會變做blame the victim？我知道咁講有可能會令受害人覺得係自己冇保護好自己嘅錯。（利申：我認為千錯萬錯都係加害者，絕對唔係受害者錯)，但唔通同受害者講「冇事㗎，你唔需要改變，一切會變好」就得？到最後，佢咩都冇準備，冇改變，再不幸遇上下一次加害佢又可以點。

有啲人仲鬧旁觀者冇幫手係錯。係，呢個世界係不停教我哋要鋤強扶弱，伸出援手。幫手絕對係一個正確嘅選擇，但唔幫手唔代表佢哋錯。幫手有好多唔同嘅風險牽涉在內，你口講幫手就易，但萬一畀人告，畀人打到半身不遂，又邊個對佢嘅人生負責任？唔覺得佢哋要畀人鬧同情緒勒索。

最後，衷心建議大家唔好再「唔通就係因為我弱，我就要學防身術、買防狼器、唔好行橫街窄巷？明明係加害者錯，應該叫佢哋唔好加害先啱！」說話同想法都可以好理想，但現實好殘酷，世界就係充滿唔同形式嘅加害。我知未必做足準備就唔好受害，但對比起唔做準備，我相信嗰受害程度會減輕好多。你控制唔到人哋，但你控制到自己。

我唔好話建議人唔好加害係錯，但我希望唔好話做好準備係唔啱。