［爆眼少女三週年］民事訴訟控告警方，多次被受阻攔

[匿名者]

［爆眼少女三週年］民事訴訟控告警方，多次被受阻攔

• 分享自 LIHKG 討論區
  https://lih.kg/3041060

大家好，希望你地仲記得我，我係2019年8月11日係尖沙咀俾警察射爆右眼嘅K，我有啲野想同大家講 。

《長文慎入》
至2019年，3年黎我被大量黨報／共匪喉舌抹黑帶風向，將我描述成為一個終極陰謀論者，可以不惜重創自己黎換取革命。

我一直選擇沉默，但佢地不但無停止繼續攻擊，甚至連我已經離開香港都唔願意放過我。外國警方更加話要特別跟住我，保護我一段時間。

而我選擇沉默嘅原因，係因為我由受傷個刻起，已經決定追究到底。
係律師嘅建議下，我決定以民事方式向警方索償，因為所有我講嘅嘢都有機會被攞出黎做證供。自問唔太聰明嘅我，都好認同律師嘅講法－保持低調。

同時希望借官司進行，慢慢將啲證據曝光，同時將所有抹黑我嘅不實報導推翻（好似Johnny Depp咁）。
以往低調處理係因為家人年時已高，係不斷有人騷擾、跟蹤、將全家資料放上網後，一家人情緒都飽受困擾，事後更相繼失去工作。
亦都擔心為咗唔知會唔會有啲砍人唔洗付出代價嘅痴線佬，對我屋企人唔知做出咩事，我唯有選擇沉默。
ps* 係811事件後全家有過短暫搬屋，然而都係有班帶cap帽嘅男人上門拍門叫囂，所有証據原本係預左上庭先講。

而係接近3年後嘅今日，我決定再次出聲。再出聲嘅原因，係因為法援處多次阻撓，想cut左係2019年已經批出嘅民事案法援，令我忍無可忍。

3年嚟，法援署不斷要我上報資產，我哩啲窮撚嘅資產長期得4位數以下點會唔合資格。但因有個舊戶口仲要打簿，我又唔係香港，本簿亦唔知係邊。雖然個戶口好耐無用入面只有幾毫子。而之前交過一次法援署都知個戶口基本上無郁動，但都不斷針對我呢個戶口。
終於係限期前我地用盡方法交到証明，而佢哋都靜左幾個月，我地都諗住終於安全進入最後階段。

直至係民事訴訟案件申索嘅3年限期前，2022年3月，法援處再次出信，希望我重新考慮要唔要提告 (意思大概係話：你勝算唔高，我地有機會cut你法援)。

當我地律師回信後，係2022年5月，法援處再次來信，指出左3點：

1）預計警方聲稱使用此等武力係合理；
2）單純嘅疏忽不足以構成惡意傷害；
3）要追究警務人員嘅行為責任，需建基於有冇惡意傷害，
而惡意嘅意思係指，佢會否知道因佢嘅行動而令我遭受損失，而佢清楚知道佢嘅行動係違法。而困難部分係因警察有權攜帶武器並開火。因此，必須證實開槍嘅警員係有意為之。

法援處來信節錄：

佢地又要我地提交大狀嘅意見書，俾佢地睇完再決定cut唔cut。

意見書就嚟要交，相信短期內就會知結果。但講真，我地呢種「政治」官司，佢哋都預左我地輸梗嘅情況下，比錢我地打咪姐係掉錢落海，所以我地都幾肯定會被cut法援。依架佢地嘅做法係搵其他藉口cut法援，等你無錢打官司而自動放棄。

雖然佢地嘅論點係好唔合理，但我地仍然無可奈可。
係佢地眼中，幾高程度嘅武力都係合理，你啲暴徒最好一槍一個；據佢地所講，若果疏忽唔係理由，咁不如取消埋「誤殺」呢條罪，個個上庭都話無心嘅咪無人犯法？；
而我作為受害者，我又點證明佢唔係惡意，咁撚大個身唔打，係打頭，佢地又証明個下點唔係惡意even專登開槍？；
而佢雖則有權開火，唔代表佢有必要開火，又唔叫佢解釋點解要向衝突地區嘅反方向開槍？

不過其實講幾多都係嘥氣，3年黎睇住啲x官面不改容咁講埋住啲歪理黎判刑，接受埋個班所謂誠實證人前言不對後語嘅證供，擺明砌生豬肉都可以入罪嘅時候，唔洗佢哋講我都知道即使開到官司都好大機會輸。

無人會公開講法援處嘅政治打壓，因為對比起要入獄受刑嘅手足，我呢種打壓真係算唔上係啲乜嘢。但事實係，佢地用盡所有方法去達到佢地嘅目的。呢啲可能係每個人眼中都係好少事，所以無乜人會重視呢個啲問題，而佢哋就會陰啲陰啲咁做去打壓手足。

最後，我會係知道法援處嘅決定後再開post同大家講。如果法援處真係cut我法援，講真我都無錢打官司，上兩次JR單案係未有法援幫助期間仲欠緊30萬。

到時，我會公開大家都好想睇嘅出院summary，比啲智商正常嘅人類判斷下，到底佢地口中嘅‘彈珠’係咪可以做成咁嘅傷勢。（醫療紀錄全部都係冗長嘅英文，百幾二百張紙，唔知睇黎做乜）

同時都好希望大家比啲意見我，仲可以用咩方式去爭取香港人應有嘅公義。我要嘅唔係咩賠償，我想要係一個判決，一個指出警隊有意圖傷害，使用過分武力嘅判決（有人向我提出過國際法庭訴訟，我好想去做，但實際要做係相當困難）。

多謝你哋睇曬，太多野發生有啲1999。

希望大家推下po 留下言講下可以點做