一名離職香港警察千字文自白

[匿名者]

【一名離職香港警察千字文自白】

睇返最近警隊Facebook某個Post既精彩留言，其實大部份師兄都係講緊真心說話，亦反映緊真實嘅狀況 — 離地繼續離地，無謂要求繼續多多。警隊兩萬幾人嘅下屬人員並唔係要搞對抗，只係想表達個人情感，同埋幫助警隊進步，吸納新血。

現今警隊不斷想增聘人手，但內部厭惡文化依舊不變，不珍惜現職或者新加入嘅同事，依然行嗰套「唔鍾意咪唔好做囉」，「又無人用槍指住你做」。依家又吹到要DR個啲用正身留所謂Bad Comment嘅同事，我想講下，其實好多同事都好拼搏，唔怕做，只係擦鞋文化扮野文化馬房文化真係改不了，搞到做唔到實事。心灰意冷就一定，仲講咩團結齊心口號辛苦但值得嘅，連自已人都唔介紹親友嚟做，連自己份工都唔敢講出嚟，真係吸引到人嚟做咩？幫辦唔會請唔夠人架，因為福利人工太好，街佬請唔夠咪內部晉升囉，缺嘅只有伙記渣嘛。

1️⃣
警隊高層嘗試好靚仔咁包裝呢份工，放大警員頂薪4萬4字眼(做第36年先有) ，入職有宿舍(除芬園之外，最快12年兵+1個仔女先有) ，4年推薦升沙展7年推薦升時沙(雷洛時代？？第4年舉手想見比人問候到你想喊啦) ，無錯架無呃人架，但成件事係人都知係科幻野。

2️⃣
麻煩認真搞一個誠信招募啦，將真實嘅狀況反映比政府高層知，話返比想投考嘅市民，比市民認真對比下同其他工作優劣之處，免得一陣入到嚟訓練完之後先發覺不似預期，浪費時間同人力物力。

3️⃣
本身新制之下無乜福利，大假又少，工作量又多，成日長時間工作。2019年後，短短3年多咗乜乜法又599又448G無人機條例又窺淫罪，環境急速轉變，野做多咗，薪酬工種比其他紀律部隊無乜明顯優勢，無人投考或者辭職率高都係正常，因為醒目嘅市民係會比較唔同工種。當發現份工無優勢，原來會無朋友，原來要處理屍體，原來工作範圍極廣，唔做警察都好正常，高層有無諗過致力去改善下依家警隊工作？推返啲波比其他部門做，或者唔好做埋啲19門面野？而警隊高層又可唔可以減少啲好大喜功？ 相信資深少少嘅同事都做唔少呀蟲介紹，依個做緊伙記嘅一定會明。

4️⃣
疫情其他執法部門可以唔收犯，可以唔收case，又可以WFH，得警隊講明要追599，最後做到野，淨係599都幫政府庫房帶來10億收入，未計525，570同埋其他定額罰款告票🙂
所以現今新仔一出學堂淨係覺得自己淨係識告市民599，市民向警察跪地求曉比人影相放上網，觀感都唔好，最後辭職，大量真人真事。

5️⃣
警隊部份高層無同理心，2022年2年疫情爆發最嚴重時，警隊好多成員都中招，或者做咗密切接觸者，搞到人手緊張，但依然好多西老細怪責同事病咗，不斷比說話同事聽，講埋啲9話，就連想放打針假AA，上級都想開你拖咁款，問下大案隊啲IO咩感受。

6️⃣
警隊部份高層後知後覺，上次疫情咁遲先爆係好彩，當一爆發嘅時候原來係無任何對策去處理，Eg：啲犯中咗招點樣處理，II, O記陽性入境處落閘唔收犯點樣處理，伙記RAT陰性但明顯初步中招，上頭都唔識主動批無醫生紙病假，仲有啲聰明長官要求伙記喺屋企自己先扣假，好返啲再去睇醫生攞SL等等，太多啦....

7️⃣
Whatsapp打水文，某些長官Phq出生，喺文件上過份執字粒執行距執格式，前線每日IN又多，MOI case 又多，File野仲要曬精神時間做啲無謂野，喺度挑花。另一邊廂議員學校既投訴就震過貓王，Open Forum唔Open，正常合理Claim鐘Claim錢Claim唔足，DIT 跌鐘跌VL，每月一筆DSOA，OC claim完 ，柴claim完，伙記得返幾多，自己諗。某啲Case案情堅係複雜，OC叫你寫簡單啲，寫唔到就係你能力有問題，但有時損失100萬，點樣寫到80萬唔洗OC寫crime brief🤣
真係玩野！軍裝，返完一更叫你 (辨認遺體) 認魚要你Off duty 1分鐘再On duty，等你claim唔到工作12個鐘嘅飯錢，幫上面縮數，做靚條數。問心啦，開個匿名投票，我諗大把人都話遇過，所謂忠誠勇毅，不如話係養大高層個胃。

8️⃣
現職同事未必係要求加薪，但係一講Work Life Balance點解啲同事就著晒咁爆，一定有原因。警務工作要精準，首先先有足夠嘅休息，及改善現有繁忙嘅工作量，依家未通關都咁忙，日後呢？通關之後日日嚟一堆C2P holder偷野操野或者報案，點算？警隊高層唔使你做，喺冷氣房涼冷氣做冷氣軍師，Lunch跑步當然舒服。其實做警察可唔可以針對主力做返刑事案件，而唔係幫其他部門做埋啲19野，做獨立證人落Record，幫保險公司紀錄事件，幫運輸處出Loss Memo，簡單啲，總之有刑事案就做。

我已經無講合約制，退休後長期住宿舍嗰啲，始終福利問題，唔係一時三刻改變到，而且退休同事都係辛苦過大半生，唔爭論亦唔評論。本人亦希望警務處可以提供近10年警隊人員轉職去其他政府部門，辭職嘅數字比市民參考下，或者可以舉辦一下誠信Open forum 及投票比現職同事發表內心感受，並保證不會秋後算帳。

一個做咗10幾年離職同事發表完畢，謝謝 #香港警察
提交時間：2022/7/15 清晨7:26

公務員secrets