一個演唱會大概係點樣誕生

SeVen
演唱會
登入後回覆
  • 匿名者

    一個演唱會大概係點樣誕生

    聲明 :
    以下所描述的「一切內容」只根據一般演唱會流程而書寫，「一切內容」並無影射或直指任何特定演唱會或人士。內容只適合用作討論用途，並無任何實質作用，包括但不限於 : 佐證、線索等。

    作為一個退休人士，以下既只係過去既經驗

    一般而言，因為紅館檔期十分難預約，通常會提早1-2年左右申請。
    當申請經過審批然後到手，大概有9個月既時間做準備。

    前期準備主要係主辦、經理人同歌手之間開會討論

    1. 演唱會主題、預算、日期、ticketing 等等
    2. 監製導演人選
    3. 音樂總監 / 舞蹈總監人選

    以上既項目確定之後就係「埋班」
    「埋班」之後其實都係開會開會同開會。

    主要都係傾 - 舞台設計/選曲目/dancers人數等等關於演出上既所有大框架，
    確定框架之後再細化所有內容。
    上面部份通常已經有唔同既單位開始參與討論
    主要既有 :主辦 / 製作 / 舞台工程承辦商 / 經理人 / 歌手 等等

    去到中段(大概show前5個月左右)
    歌定好晒 / rough rundown 有晒，各單位就開始做唔同既準備

    • 監製導演 : 開始同 主辦 / 經理人 / 歌手(唔一定參與) 溝通彩排檔期同細化rundwon
    • 舞台工程承辦商 : 根據開會既定案出圖紙 / 準備架撐(訂製器械-後續補充) / 計算工程人手 / move in and out時間等等
    • 音樂總監 : 做音樂
      (總唔可能唔重新編排D音樂既arrangement，如果係的話，直接用MMO啦)
    • 舞蹈總監 : 開始根據圖紙mark位度跳舞相關既內容

    去到尾段(大概show前2個月左右)

    • 歌手 : 純排舞+走位 / band reh / 記歌詞 (反正就係做返佢既本份)
      通常去到呢個階段，所有對外既公開活動已經只會得返好少好少，
      或者會繼續出活動，但係可能只係佔用歌手3-4小時左右既簡單工作，
      總括而言，要留時間比歌手練習做準備，
      通常最後一個月會係接近0公開活動，等歌手閉關做準備

    • 監製導演 + 舞台工程承辦商 : 準備測試部份機關
      通常有一部份機關已經整好(未必齊晒)，製作相關單位會book一啲片廠用黎放機關同測試，測試有時有機會會有歌手參與。
      由於香港工業式微，所以機關既組件有時會係大陸製造
      (先唔好歧視先，就算係大陸做，黎到香港一樣會做QC同好多tech check，確保安全拎到證書先會用)
      不過組件可能會遇到交通/運輸/批文等既問題而導致延遲
      香港唔係無組件，但以升降台為例
      工程方係唔會將1個1人既升降台組件改造為3人或以上
      因為咁做實在太危險
      當中牽涉舞台升降台台面開口大細，承重各樣好多好專業既計算
      所以通常都係會根據設計黎重新預訂組件

    最後階段
    演出前7-10日 (需視乎預訂場館既日子同埋上一手個show幾時完/move out)
    共用底台的話會慳到D move in時間
    唔係的話，就要等上手完全move out 交吉個場
    完成交場後，到入場日
    包括 : 工程人員 / FM / 主辦 / 監製導演 / 道具 / 機械工程物料+組件 / MI 所有野分批陸續到達

    音樂總監 / 舞蹈總監 / dancers 通常倒數第8日左右先會到紅館
    畢竟搭台係真係唔關佢地事

    以倒數形式題示 :

    倒數第10日 + 第9日

    • move in 上述所有既野
    • 係紅館鏡房用大力膠布/電線膠紙做個台既線模for reh.
    • 根據現場情況開會討論rundown細節

    同步其實係一邊move in 一邊搭建，視乎舞台複雜程度而定
    通常倒數第10日 至 第8或第7日 進行搭建
    先做底台，然後再做紅館螢幕週邊既truss 架
    truss 架通常用黎吊燈、音響或者一D會升降既道具
    咁到底要幾多set truss 架/承重/點樣吊法各樣就由舞台設計既人去負責計算同承辦商做準備
    工人都係跟圖紙做野

    倒數第8日或第7日開始 (視乎多唔多舞跳)
    歌手開始係紅館鏡房做跳舞+走位既練習

    倒數第6日

    • QC check / 舞台負責人 + FM + 監製導演 走走台 睇下仲有無野執漏
    • 開開D機關試試，確保安全同運作暢順
    • 歌手繼續係紅館鏡房進行跳舞+走位既練習

    倒數第5日

    • Sound test / 舞蹈總監 + 部份dancers 輕走台 (因為仲可能執緊漏)
    • FM 開始係台底 / 機關附近落mark，方便歌手同FM係台底轉位
    • Set 台底換衫房 / 燈 / 底台通道頂燈照明用品等等
    • 歌手繼續係紅館鏡房做跳舞+走位既練習
    • 同時，根據舞台執漏程度，歌手有機會上台sound test

    倒數第4日 + 第3日

    • Dry run，歌手同dancers逐隻跳舞歌練習，因為要執返D facing and scaling
      因為紅館鏡房做唔到實際 1 : 1
      所以通常會用一日時間齋走D跳舞歌既位，step已經唔重要
      Facing 同出入位先係最重要
    • 試機關 w/ 歌手同dancers
    • production meeting 檢討+檢視要執漏既野
    • 印好晒D大細rundown比各大單位
      大rundwon係比機關控制人員/監製導演/FM等專業人士使用，入面有晒counter / remark / 機關編號順序等等
      細rundown就剩係得part數同歌單，主要係比主辦/歌手/dancers等睇，通常會貼係當眼位方便大家知道做到第幾part
    • 執聲執vc 之類
      (太細化既就唔講啦)

    倒數第2日

    • 試機關 w/ 歌手同dancers
    • 繼續dry run + sound test / 試衫各樣各樣 所有要做既事前準備
    • production meeting 檢討+檢視要執漏既野

    倒數最後1日
    早上，舞台負責人 + FM + 監製導演 開開D機關試試，確保安全同運作暢順
    中午後，通常會係歌手pick d 自己唔熟既野黎練 或者 舞蹈總監會建議
    之後開開聲，食個飯，全世界準備 2000 full dress reh.

    晚上，full dress reh.
    Show 後一定有production meeting 檢討+檢視要執漏既野
    無論係rundown / 機關 / 台面 / 音響 / 道具 / 出入位等等
    有時甚至會為趕開show通宵執漏

    然後就係第一日開show
    第一日開show
    通常1200左右各大部門負責人會現身
    檢視返尋晚/今朝通宵執漏既情況，未搞掂就繼續搞
    同埋都會開開D機關試試，確保安全同運作暢順
    歌手通常1400現身，開開聲，揀D牽涉機關/跳舞既野練一練
    1700左右就離台
    拜個神然後妝髮服
    2000左右stand by 開show

    以上係最充足時間既日程
    會因應上手交場時間/機械組裝等等而延遲
    會打呢篇野既原因
    係希望咁多位想正常討論既人知道
    一個演唱會大概係點樣誕生
    從而知道互相想討論既方向又或者想了解既細節
    而唔係由一D碎片化既資訊當中估估下
    坦白講，一場演唱會入面出任何意外，所有持份者都有責任
    分別既只係邊一個單位要負最多既責任
    (演出者可以牽涉到既只得好少好少好少部份，例如 : 唔小心撞左個人落台)

    最後，祝願傷者 平安 !

    0 :   0 0