年輕男女撞倒老伯致骨折後不顧而去 女兒狠批冷酷無情發文緝兇

[匿名者]

「到底有幾趕時間，可以令你唔睇人、唔睇路？」「到底有幾冷酷無情，先可以罔顧一個因為你受傷嘅老人家，見到佢明顯企唔返起身，你都可以走咗去？」一名港女今日在社交平台發文，指其老父下午在筲箕灣港鐵站對出時，被一對年輕男女撞跌，惟二人竟無報警及召救護車，僅扶他坐低便急步離開。樓主指父親大腿及盆骨出現骨折，很大機會需要做手術，短期內未能出院。她呼籲網民將帖文廣傳，希望有人能夠目擊整個事發過程，又指要尋回涉事二人，強調並非要算賬或賠償，「點解撞跌咗老人家，唔等埋白車來先走？正式向我同我老豆道歉」。

一名港女今日在facebook發文，指父親下午大約1時途至筲箕灣港鐵站A2出口對出時，被一對趕時間的年輕男女撞跌，「佢（父親）跌親之後起唔到身，然後兩位肇事者冇幫我老豆call白車，冇等到白車嚟，係咁以扶我老豆去地鐵站出口坐低就走咗。 」

樓主指父親大腿、盆骨都有骨折，現時需在東區醫院留醫。網上圖片

她指父親跌倒後坐在港鐵站出口感到非常害怕，不知所措，「自己一個好驚， 唔知點好，痛到講唔到嘢，好彩有途人報警」，其後救護員將父親送往東區醫院治理，「不斷話好痛，痛到瞓喺度都休息唔到，對腳郁唔到，X光見到大腿有骨折」。至下午5時左右，樓主的父親被送往骨科病房留醫，「大腿、盆骨都有骨折， 要留院觀察，暫時未同到骨科醫生直接溝通， 但係護士話好大機會都要做手術 ，短期內都唔會出到院」。

她形容父親平日「算幾精靈」，平日會與一班「老友記」去飲茶，雖然年紀大行動比較緩慢，但自己一個人在附近散步是完全無問題。對於父親遭遇橫禍，樓主坦言並非要算賬或賠償，只是希望能夠找到當時目睹事發經過的途人或涉事二人，了解當時情況，「點解撞跌咗老人家，老人家明顯企唔返起身，點解唔call白車、點解 唔等埋白車來先走？」

她要求涉事兩人向其父親道歉，又質疑二人的行為，「到底有幾趕時間，可以令你唔睇人、唔睇路？到底有幾冷酷無情，先可以罔顧一個因為你受傷嘅老人家，見到佢明顯企唔返起身，你都可以走咗去？」

不少網民認為涉事二人應該向樓主的父親道歉並作出賠償，另有人希望樓主的父親能夠早日康復，「一定要搵返呢一男一女親自道歉，唔可以因為急跑而撞到人！」、「撞到老人家可大可小！手尾可以好長」、「不顧而去 ，一定唔可以道歉就算」。

警方表示，中午12時58分，有一名男途人報案指一名老翁在筲箕灣站A2出口跌倒受傷，需救護車送院治理。