洗米華沙士彈起 新冠沒落 步崩牙駒後塵

[匿名者]

太陽城老細周焯華（綽號「洗米華」）單案下週一（9月19日）正式在澳門開審，令人想起佢「師公」崩牙駒尹國駒。這兩位江湖大佬在濠江叱咤風雲，但最終都被阿爺收皮。

拇指外翻的背後

2015年時，雜誌狗仔隊偷拍到洗米華在泰國度假，洗米華在酒店泳池邊手持「向林肯學領導」一書，邊曬太陽邊睇書，留意到赤腳的洗米華有嚴重拇趾外翻，佢雙腳正是「英雄莫問出處」之鐵證。

周焯華拇趾外翻

洗米華出身卑微，發跡前經常著住對尖頭皮鞋，在澳門回力球場一帶做「扒仔」，何解？即是圍住賭客扮教路，博賭客贏錢打賞，輸錢就介紹大耳窿來抽佣。

一山不能藏二虎

洗米華是14K崩牙駒的徒孫，但澳門回歸前崩牙駒與水房賴爭地盤，搞到澳門片地炸彈無日安寧。1998年澳門司警白德安坐駕被放炸彈險些喪命，即親自拘捕崩牙駒，最後在澳門1999年回歸前兩個月被判刑15年，錯失了澳門賭業起飛既黃金機會，至2013年才出冊。

被四太相中

而洗米華則乘住個賭業升浪上位，他在03年沙士時崛起，那時疫情之下無人過大海，佢首創網上百家樂並做直播，財源滾滾來，再買十幾個賭廳來做，變身實體賭王。那時就連四太都睇起佢，據知四太收「𡃁」時，都「相」過幾個馬仔，洗米華當時並非頭馬，但頭一、二位能當左右護法，但只係識打生打死，洗米華就唔同喇，四太欣賞佢「食腦」，及後更成為洗米華幕後最大嘅支持者。如今洗米華出事，四太都愁眉苦臉，身體亦大不如前了，其千手觀音之光芒難復見。

賭場風雲 人生如戲

古惑仔出身嘅洗米華，明白三更窮五更富，有景就要駛盡，悄然落寂時就無人會睬你。2013年，崩牙駒出獄後希望重出江湖，那時洗米華已經有14個賭廳，有次崩牙駒特意設夜宴款待江湖中人，在主人家旁留了一張枱給洗米華，大大張紙寫上「華哥」，結果成張枱無人到，洗米華認為崩牙駒已經脫節，還使人送張支票給他當打賞搲爛腳。惟其如此，才是做大佬嘅作風，下面𡃁仔先至佩服你嘛！真係做戲咁做。

借女人谷名氣

彈起後再要發圍錢搵錢，當然要名氣。洗米華2012投資電影「低俗喜劇」大收旺場，與女主角Da Da傳緋聞已夠juicy，跟住溝埋Mandy Lieu在賭場坐住大脾來賭錢有如「霸王妖姬」，再不斷上演大婆鬥二奶爭寵，洗米華在短時間之內人氣急升。同時間部署上市大計，2017年正式以太陽城集團在香港上市，風頭一時無兩。

大搞網絡賭博

不過Big Brother is Watching You。2013年澳門賭業已經有些𤓓味，皆因唔少大陸高官，包括前重慶市委書記薄熙來，銀行國企老總都鍾意去澳門賭番兩手，有超級賭客在手的叠馬仔好搵過賭廳，當時北京已經出手規範叠馬仔嘅生意，於是成立博彩業中介協會，洗米華都識做擔任副會長。但同時加快賭業轉型，大搞網絡賭博，而且跨地域去發展國內、東南亞甚至澳洲業務，最和味是「賭枱底」，即是枱面同莊家賭，檯底同另一些人賭，注碼可以是枱面的10倍。呢個搵銀大法亦成為洗米華案的罪狀。不過有如阿里巴巴主席馬雲與其友人講：「沒有解決不了的事情，最重要有數講。」今鋪看洗米華及其黨羽肯「嘔」番幾多錢出來，澳門檢察院已要求判處賠82億予澳門政府，不過在澳門「嘔」完，又使唔使返去國內再「嘔」呢？講到尾澳門賭業興旺乃多得昔日之「北水」而已。