的士乘客紅隧過海要求收據印西隧車費呃報銷 的哥拒絕：犯法㗎喎

[匿名者]

的士司機將企圖索取假收據的乘客容貌公諸於世。網上圖片\示意圖片

部分公司會為加班的職員支付的士費用作為福利，有的哥於社交平台訴說指，日前遇到一對情侶欲坐的士由上環往粉嶺，並決定經紅磡海底隧道過海，女乘客抱怨車費太貴，其男友便向司機要求的士收據改印西隧的車費，以便他們向公司報銷，抵銷昂貴的車資，惟遭的哥以犯法為由拒絕，引起熱論。

該名的士司機於facebook群組發文指，早前夜晚於上環永安中心遇到一對情侶截車，欲往粉嶺兩站，「男嘅住火炭銀禧花園，女嘅住皇后山村山麗苑」，並決定經紅磡海底隧道及獅子山隧道前往目的地。

的士乘客經紅隧過海，竟要求司機收據印西隧車費。fb圖片

的哥將涉事情侶的照片放上網公審惹議。fb圖片

行車途中，女乘客向男友抱怨「好貴呀，搭咁遠的士返去」，對方則指可以向公司報銷車費，「叫師傅幫你印西隧飛囉，師傅你OK㗎呵？」，的哥聞言立即拒絕，「犯法㗎喎」，惟該名男友堅持做法無問題，「我地成日都咁喎，得㗎」，的哥仍拒絕讓步，「一係你落車再搭過第二架，我行咩隧道就打咩單」，該對情侶隨即沉默不語。

的哥續指，該對情侶其後繼續閒聊，男乘客於銀禧花園下車後，的士續駛往至山麗苑途中，女乘客仍未死心，遂要求的哥改發西隧車費，「我成日都係咁㗎喎，真係無事嘅呢」，的哥不滿直言，「唔該你哋唔好成日叫司機做呢啲咁嘅嘢，我哋唔會幫你哋做犯法嘢！」。的哥亦在留言提醒一眾同行不要誤墮法網。

帖文引起網民熱論，有網民支持的哥的做法，「的哥做得好，仲有教育意義」、「睇嚟佢哋都唔係第一次咁做，佢哋咁做其實係欺詐，欺詐公司嘅錢」、「做得好，唔可以助長呃騙行為」；有人則批評的哥不應公審乘客，「嗰兩條友確實係唔啱，你當面拒絕再話佢咪算，點解要po人出嚟」、「其實好小事，唔使放人地個樣上嚟嘅！你一句唔得咪算囉！」。

據《刑事罪行條例》第71條，任何人製造虛假文書，意圖由其本人或他人藉使用該文書而誘使另一人接受該文書為真文書，並因接受該文書為真文書而作出或不作某些作為，以致對該另一人或其他人不利，則該名首述的人即犯偽造的罪行，一經循公訴程序定罪，可處監禁14年。

早幾晚十一點幾，喺上環永安中心接左支order入粉嶺兩站，男既住火炭銀禧花園，女既住皇后山村山麗苑，上車後問左行紅隧獅隧後就開始以下對話：
女：好貴呀，搭咁遠的士返去
男：Claim公司之嘛，咪叫師傅幫你印西隧飛囉，師傅你OK㗎呵？
我：唔得㗎喎
男：點解呀？
我：犯法㗎喎
男：我地成日都咁喎，得㗎
我：一係你落車再搭過第二架，我行咩隧道就打咩單
男：哦
沉默過後，佢地傾佢地既野，男既先喺銀禧花園落車，去到山麗苑，女既仲未死心
女：我成日都係咁㗎喎，真係無事既呢
我：唔該你地唔好成日叫我地啲司機做呢啲咁既野，我地唔會幫你地做犯法野
真人真事，有錄音，不過費事出
歡迎告我侵犯私隱，不過我都會告返你地意圖引誘他人偽造文書
#廉恥何價

https://www.facebook.com/groups/1477482755899091/posts/3248550402125642/?comment_id=3248771005436915