薄扶林野豬疑遭車撞奄奄一息 消防鐵漢暖心撫慰送最後一程

[匿名者]

消防員喺好多人心目中都好Man，不過其實佢哋偶爾都展露「暖男」一面。昨日喺香港仔薄扶林，有一隻小野豬懷疑畀車撞傷，瞓喺路邊奄奄一息，消防員救援期間，不時用手輕撫佢身軀（見圖），無意間流露咗鐵漢柔情一面，但無奈野豬最後都傷重不治。消防處之後就同Kelly講，其實消防員都接受過拯救動物嘅訓練，知道其中嘅技巧！

事發昨早八點左右，喺香港仔薄扶林域多利道近數碼港道行人路，有路人發現一隻長約兩呎嘅小野豬，瞓喺路上奄奄一息，口鼻都有血，懷疑橫過馬路嗰陣，被車輛撞傷。消防接報之後到場拯救，期間有幾個消防員不時輕撫佢身軀，之後仲拿紅膠袋，遮蓋咗野豬頭部，無意間流露鐵漢柔情、細心嘅一面，令人窩心暖意。不過可惜嘅係，野豬仔當時已經沒咗反應，愛護動物協會人員到場檢驗，證實佢已經傷重不治，食環署之後就把屍體移走。

消防處就話，其實所有消防員都要接受拯救動物嘅訓練，包括安全指引、點樣配合其他部門進行拯救等等。而處方過去亦都安排愛協講授拯救動物嘅技巧，並將相關資料上傳到內聯網畀屬員參考。

https://hd.stheadline.com/news/columns/0/20221029/ 1004741