十七世紀嘅南丫島人：我要用六百人進攻台灣

[匿名者]

https://www.facebook.com/permalink.php?story_fbid=pfbid02AWLhDNfB26ESyfbbXN6PbJeazmxm3KoLrscvap8KLT9jxVLMtjM1uuMPRyBEpBm2l&id=100063719379840

撰文：化外

【早過杜汶澤去台灣發展嘅香港人！──連個名都非常適合做代言人嘅南丫島海盜劉香】

1634年，海盜劉香帶著僅僅600人進攻台灣，而呢個要明帝國七武海鄭芝龍費煞思量去殲滅嘅舊部，相傳係南丫島人。

1630年代，隨著鄭芝龍接受招安，劉香就好似替補機制咁開始上位。除咗南丫島出身嘅傳說之外，劉香亦有被記載係福建人，但總之喺之後嘅幾年，佢除咗掀起東亞大航海時代嘅新浪潮，逼使明帝國再次海禁，仲幾次侵襲當年香港被行政規劃在內嘅新安。

明帝國顯然又又又無辦法處理呢種海上威脅，咁最乾手淨腳嘅做法，當然又又又係揾返水上適性S嘅鄭芝龍出手。

喺幾年之間，劉香同鄭芝龍互有勝負，但攻守，或者不如話海賊同陸上政權嘅條件喺唔對等嘅：後者要有決定性嘅斬首，但前者只需要不斷逃脫，就有下一個擄掠東亞大陸沿海嘅機會。即使鄭芝龍往往有局部勝利，但一個唔該劉香就會好似酒店房個remote咁失去蹤影。

用返新安做例，就係劉香喺1633年2月侵略被鄭芝龍打敗，但先3個月唔到，劉香已經同新安講我返嚟喇劇劇。大拿拿兩百幾隻船嘅船隊，明軍亦都只係可以將生擒對方幾個人。呢一年，劉香甚至嘗試同台灣嘅荷蘭人合作，然而喺見慣世面，無論人才資金都有極大優勢嘅鄭芝龍協防下，一開始喺廈門畀荷蘭人大敗嘅明帝國都仲係贏咗呢一仗。

或者係深明招安比剿滅有效，1634年，同類嘅招安嚟到劉香身上。

呢一年，由於脆弱嘅合作關係，遠遠比唔上現實嘅利益衝突，劉香帶住雲梯同幾盒椒鹽白飯魚進攻荷蘭人喺台南建立嘅堡壘熱蘭遮城，但最後因為攻城同後援能力都唔夠而被逼退卻。

明帝國估唔到嘅係，劉香到呢一刻都無打算受降。誤信對方假降嘅帝國官吏一上船就畀劉香扣押咗成年，直到鄭芝龍對劉香嘅終局之戰。

1635年3月，劉香再一次侵襲新安，知縣烏文明拒絕提供物資畀佢，雙方唔止對峙咗成個月，劉香更加喺城外縱火。然而重課玩家鄭芝龍再一次突入戰局，最終劉香喺田尾嘅海上被徹底圍困，部下包括幾個葡萄牙人同日本人在內死咗六七百人，劉香最終勉強保全尊嚴，用炸藥自爆身亡。

自此，沿海回復和平，鄭芝龍亦因此擠身正式軍官，進一步擴大勢力，奠定後來將會反過嚟強大到驅使大陸帝國再一次海禁以至遷界嘅勢力。

最後想講，我地往往對實際上同香港幾乎毫無交集嘅人物故事（例如關羽溫酒煮華雄之類）瞭若指掌，對呢個香港參與其中嘅海上世界嘅歷史同傳說所知甚少──

你以為我又想講大家淨係識得啲大中華歷史人物？

唔係，呢點就梗啦。但我想講嘅係，其實關羽張飛同劉香都有個共同點，就係劉香後來被流傳成一個叫香姑嘅女海盜，仲有傳說話佢就係香港個名嘅來源，

簡直係領先歷史人物女體化業界一整個世紀。

參考資料：
早期香港史研究資料選輯，馬金科編。2018年三聯書店出版
香港西區街道故事，魯金著。2021年三聯書店出版
海上傭兵：十七世紀東亞海域的戰爭、貿易與海上劫掠，鄭維中著。2021年衛城出版
台灣人的台灣史網頁