【港映語聶 1】香港點解開埠？

[匿名者]

【港映語聶 1】香港點解開埠？

https://points-media.com/博客/【港映語聶-1】香港點解開埠？/

本月二十六號，係香港誕生日，歷史上稱之為香港開埠日｡雖然係對香港極為重要嘅日子､之但係因為教育､因為政治種種原因､長期都鮮為人知､即使偶有提及､往往都流於兩種表面論述､例如比較英國本位嘅「香港開埠象徵英國殖民東亞之始」､又或者中華本位嘅「西方船堅炮利侵略中國､不平等條約及割地屈辱之始」｡但香港點解開埠？香港嘅角色係乜？依啲種種應該以香港本位理解嘅事､喺戰後香港流行嘅中華史觀歷史教育影響下､就變成不可提及嘅歷史｡

咁究竟香港點解開埠呢？講依樣嘢之前､首先我哋要理解香港早期嘅原住民､同埋佢哋喺英國始政之前嘅社會地位｡香港原住民係今日仍然普遍見於大澳､香港仔､青山灣等地嘅水上人､葡文稱為Tancareiras 並日後借用至英文､雖然以「蜑家」（漢籍原為歧視用語）譯音､但葡文與漢文含義係有天淵之別､因為歷史原因､唔少澳門土生葡人祖先皆有原住民血統､因此Tancareiras係日常用法以至文學作品入邊､Tancareiras一字多數屬中性或偏正面用字｡

原住民嘅由來､喺漢籍､英､葡､日等記載都有提及並先祖源自古代､居於今日兩廣至越南北部嘅越族｡漢人佔領越地之後､部分唔願意臣服嘅越人就逃走入海､慢慢漢人建立嘅儒教體制社會就視依啲逃海原住民為「非人」､以類似種姓制度嘅體制､剝奪佢哋嘅自由､例如不可上岸居住､不可與陸上居民通婚､不可參與科舉（換句話說等同壓制讀書識字權利）等､而且世代繼承｡

當歐洲人到達東亞､最早亦最願意與歐洲人溝通､合作以至通婚嘅､都係Tancareiras｡除咗上邊提到澳門土生葡人嘅文學記錄､英國文獻入邊都有強調tancareiras 係東印度公司東亞地區重要嘅貿易夥伴｡所以去到1839-42年嘅英清戰爭（中國稱為鴉片戰爭）､Tancareiras就作為英軍嘅協力者參與戰爭､作為回報､當時嘅英國遠征軍代表應允會給予原住民保護､及還予原住民被剝奪嘅人身權利｡

不過凡事都唔係一帆風順､雖然義律爵士於1841年1月26號宣佈香港開埠､但英國本國並唔認同､香港因而出現短暫嘅「地位未定狀態」､而依個時候､原住民曾經同英軍共同作戰嘅事實就顯得非常重要､義律上書印度總督嘅信件､清楚列明：「(the British) have been so long dependent for (Tancareiras’) assistance and supply」､以道德原因及義律重申嘅經貿價值､最終說服英國､於1842年《南京條約》簽訂時確認香港為英國領土､而原住民嘅開放及香港開埠經過､亦確立香港嘅特質—不分族裔嘅歐亞混合文化融爐､直至戰後中華民族主義嘅南侵､但依樣已經係另一個故事｡

參考資料：

1. Barnett, K. M. A. (1964). Hong Kong before the Chinese: the Frame, the Puzzle, and the Missing Pieces. Hongkong: Royal Asiatic Society Hong Kong Branch.
2. Eitel, E. J. (1895). Europe in China: the history of Hong Kong from the beginning to the year 1882. Hongkong: Kelly & Walsh Ltd.
3. Morse, H. B. (1910). The International Relations of the Chinese Empire: the Period of Conflict 1834-1860. Hongkong: Kelly & Walsh Ltd.
4. 羅香林. (1955). 百越源流與文化. 台灣：中華叢書委員會

作者簡介：

Calvin Tatara､香港繆詩菴Museum of Hong Kong創辦人､盼以香港本位重新解構香港文史及殖民地比較研究､始終相信The Best Inspiration is Truth｡