戴偉浚被深圳隊拖糧想轉去歐洲賽場 但被要求2000萬轉會費

[匿名者]

正喺荷蘭養傷同進行恢復訓練嘅戴偉浚，目前與深圳隊之間嘅薪金問題，仍然未能得到解決，而呢位香港出生嘅中國國腳，目前正申請維權，希望透過仲裁，以喺薪金勞資糾紛上，得到最終答案。

23歲嘅戴偉浚自從2020年加盟深圳隊後，合約上年薪係逐年遞增方式，雖然加盟初期係隊中年薪最低一批球員，但隨住時間過去，目前已經係隊中頂薪一族。不過，基於中國足球經濟實力不再，深足財政問題都成為困擾佢哋嘅難題，而最近深圳隊同國內球員嘅債務重組工作基本上已經完成，包括老將郜林在內亦達成一致協議，但戴偉浚問題仍然未得到解決。

據中國媒體報道，深圳隊與戴偉浚喺欠薪清理問題上仍然未有共識，球員向國際仲裁院申請維權，所以要等最終判決結果先至會有決定。據稱，戴偉浚曾經提出條件放棄追討10個月欠薪，以換取離隊自由，目標係重返歐洲賽場，但深圳隊方面要求一筆2000萬元轉會費，先可以俾球員離隊，所以雙方就一直無法喺解決方案上達成共識，球員想放棄錢換取自由亦唔係易事。2000萬元轉會費並非小數目，戴偉浚想重返歐洲賽場，希望羅致佢嘅球會亦必慎重考慮。

戴偉浚因傷退出最近中國男足亞運隊集訓，正喺荷蘭進行康復工作，據佢個人最近嘅社交媒體發佈訊息，已經重回到球場練習，佢自己亦感到興奮進展唔錯。至於未來會喺繼續留喺深圳隊，抑或再赴歐洲賽場，相信「特別」關心佢嘅香港球迷亦非常期待答案。