Happy Kongner： 為何我要留下來

[匿名者]

https://www.instagram.com/p/CtYEmyrrO4Q/?igshid=MzRlODBiNWFlZA==
happykongner #opinionkongner : 為何我要留下來

總有人會問，問我點解唔離開香港。

例如話香港係大刀會係美麗新香港又有；話留喺香港係好危險係會畀人拉又有；話呢個地方無未來無前途無將來無自由無人權無天理又有，問我唔走等幾時。好多時我都會答佢哋一啲鳩 but true 嘅語錄：「呢個世界對我嚟講點樣都係一個牢籠，走去邊個牢籠又有啲乜嘢分別」，又或者係「人窮，移去邊都窮，去到邊都唔會自由」，嘗試去表現出一種灑脫嘅諗法，等大家識趣就唔好再問。不過事實就係，我心底裡其實並不灑脫，而只係有好多嘢我放唔低。

最近，我收到嚟自石牆內嘅一封信。呢封信係 @shiken_420 托朋友轉交畀我。可能喺呢度大家都會好奇，點解子謙會有信畀我嘅呢？原因就係佢其實係 KONGNER 社群嘅一員，姐係話佢係我哋其中一位弟兄。呢個亦都係點解佢信嘅抬頭寫嘅係「致各位弟兄」，姐係話佢呢封信係一封寫畀我哋 KONGNER 社群嘅一封「家書」。至於信中嘅內容我喺上個星期六嘅直播都已經讀晒出嚟，有興趣想知講乜就自己去聽返，在此不贅。另外，我亦都收到一個好消息：另一位弟兄家樑亦都因為表現良好，應該喺今年十月就會重獲自由。

子謙嘅信同家樑嘅好消息都為我長久以嚟洶湧嘅心情帶來咗一絲平靜，亦都滋潤咗我疲憊嘅軀殼。的確，可能大家經常見到我都係鬥志滿滿，有一種「泰山崩於前而色不變」嘅從容自若，但事實上，我每日都會質疑自己，不斷反思自己係咪做得唔夠好而令到 KONGNER 發展得唔夠快。而呢段時間入面，我同我嘅團隊一直埋頭苦幹，奮力就係為咗希望將 KONGNER 推上一個可以恆常營運嘅軌道，而唔使成日覺得朝不保夕。即使喺早前面對唔同嘅難關，有啲甚至係會影響到 KONGNER 存亡嘅難關都好，我哋都係尋求自行揾方法解決，而從來都唔想對住大家打出「告急」牌。因為我好清楚如果無一個良好嘅運作體系嘅話，無論「告急」幾多次，到最終都係唔會捱得住，咁不如從一開始就唔咁做。我知道我哋亦都有好多無謂嘅堅持，但貫徹始終都係務求自力更生，喺從來都唔想成為大家嘅負擔底下堅毅向前。不過得悉子謙同家樑嘅消息亦都令到我覺得我做 KONGNER 搞社群，原來真係「念念不忘，必有迴響」。

喺四年前嘅 6 月 8 日晚嘅直播，我講出咗一個擔憂，擔憂最終亦都成為咗事實。直至今日，我都從來無認為當年係 The End of Everything，而家都唔係，所以我從來都無灰心又或者氣餒過，所以我無選擇過放棄，我希望我可以用我想要嘅方法堅持落去，所以喺四年前開始，我就選擇咗要建立一個屬於自己嘅群體。

KONGNER 嘅存在，為嘅從來都唔係證明畀人睇我嘅 Vision 同抱負有幾咁超然，而係想建立一個可以畀我哋安心「圍爐」嘅社群。我深信社群係我哋身處喺呢個時代嘅其中一個希望。因為我從來都相信：憑一口氣，點一盞燈。有燈就有人。我推動 KONGNER 社群，就係為咗提供一個希望。等我哋知道，無論喺幾惡劣嘅環境入面生活都好，最終都能夠靠互相扶持而捱得過去。我記得有牆內弟兄曾經講過，知道我哋社群會一直喺度，牆內嘅時間就無咁難捱。其實對於任何一位弟兄嚟講，我相信亦都一樣。無論對於喺牆內嘅弟兄又好，定係一同生活喺香港嘅弟兄又好，抑或係向世界進發嘅弟兄又好，當大家有一個共同希望，我哋就唔會感覺到孤單，因為社群會連繫住大家。而呢個希望唔係虛妄嘅，因為建立社群從來不能假手於人，係要靠社群入面各位一手一腳建立起嚟。

我經常會收到唔同嘅 Message 或者會有弟兄走嚟同我講，話我改變咗佢哋，令佢哋有咗希望，有咗目標可以追求。我通常都會同佢講，你唔係應該多謝我，而係應該多謝你自己，因為唔係我令到大家改變，而係你哋作出嘅選擇改變咗你哋自己。喺呢度，我嘅意思係，真正帶畀你哋希望嘅唔係我，而係你哋自己。我從來都唔認為單純我嘅出現係會帶到啲乜嘢希望畀人，我係想大家知道，大家覺得社群可以為大家帶來希望嘅原因，並唔係因為我，而係因為你哋由心而發嘅選擇同行動，為你哋自己帶嚟希望。亦都因為咁，我先會用盡唔同方法去鼓勵同幫助來自各界嘅弟兄，令到佢哋可以靠自己解決自身嘅問題，繼續行落去。

從細到大，我哋接受嘅教育都係充滿社會達爾文主義色彩，社會原子化令到我哋無辦法相信他人，嘗試以尖酸刻薄嘅批判築成嘅保護網嚟保護自己，以致人與人之間嘅關係變得越嚟越疏離，最後每一個人身處呢個社會入面只會得返自己孤獨前行，只能以個人面對世界。喺咁嘅社會之下成長嘅人，一係就變得利慾薰心，心入面只係得返一種自私自利嘅利己主義，一係就會被世界唾棄，被社會邊緣化，形單影隻。而我創立 KONGNER 呢個社群，就係為咗解決呢個問題，就係為咗打破原子化社會為大家帶嚟嘅影響，就係為咗令到大家可以學識靠自己雙手，再加上團結一致齊心合力，係可以成就到好多事，為自己嘅社群以至街外人帶嚟希望。而有咗社群之後，我哋先可以有「根」。

我哋需要「根」，但「根」係唔會無緣無故出現，係要有有心人栽種，「根」先至扎得實。而作為社群發起人嘅我，要栽種「根」實屬責無旁貸，所以我選擇留喺香港，就係為咗要好好培育呢個名為「社群」嘅根，等大家生活喺呢度嗰陣，都可以有一個心安且安身立命之所。

呢個就係點解我會選擇留下來。

✍🏼
@micahcheng